للتحدي مكان

هذا المشهد من حياتي بعنوان ( وللتحدي مكان ! )  

التاريخ: الثلاثاء ، 5-8-2008 م الزمان: 1:48 م المكان: الظهـران جلست الساعة 8:30 ص
 

رحت لعمادة شؤون الطلاب لـ أخذ خطاب لوزارة الإعلام
( علشان نطلع تصريح للنص إلي بنعرضه في المسرحية)
روحتي للوزارة صعبة لأن باقي 11 يوم عالعرض !
الوزارة تحتاج أقل شيء خمس أيام لإخراج النص!
مطابع الجامعة تحتاج أقل شيء أسبوع أو خمس أيام لطباعة الإعلانات !
متى نوزعهم ؟ متى الطلاب يقرونهم ؟!!!!!
ومسرحية بدون إعلانات ! شبه فاشلة .. بيكون مافي جمهور !
وإن فشلت المسرحية أحبطوا الممثلين وخرج المسرح بصورة
سيئة أو غير كافية مقارنة بالجهود التي بذلت ! .. يعني الدعوة خبصه !
أتصلت على مشرف النادي ودلاني على شخص أروح له علشان يخلص أوراقي بسرعة
الساعة 1 نمت .. والوعد بكرة أصحى الصباح ..  

التاريخ: الأربعاء ، 6-8-2008 م الزمان: 3:00 م المكان: الظهران اليوم جلست الساعة 8 الصباح ..
مهمتي لليوم أني أروح وزارة الثقافة والإعلام
علشان أطلع فسح رسمي للنصين المسرحيين إلي بنعرضهم بعد أسبوع .. - لازم أي مسرحية أو فلم أو مسلسل يعرض في السعودية لابد وأن يمر على
الرقابة في وزارة الثقافة والإعلام ويحصل فسح (تصريح) بأن يعرض للعامة -
وبعد ما أخلص من الوزارة لازم أرجع الجامعة علشان الوكيل يوقع الأوراق ثم نودي خطاب
لمطابع الجامعة علشان نطبع الإعلانات بسرعة قبل العرض لأن ماباقي إلا 11 يوم عالعرض !
 

ويبدأ يومي بإذاعة البحرين في راديو السيارة ,,
أنا من عشاق الراديو !! .. أتابع برامجه وأحب أستمع لآراء الناس من كافة الأماكن
ناس من البحرين والسعودية وقطر والإيمارات والكويت .. حلو أن نستمع لإختلاف
الآراء و وجهات النظر المتباينه
المهم .. رحت الدمام ، رطوبة وزحمة كعادتها .. رحت صوب طريق التقنية
 

وهناك شفت حالات بناء وعفسه .. طالعت عدل وإلا بيبنون العثيم مول للدمام
 

ياسلااااااام تدرون شمعنى هالكلام ؟
معناتها بغيرون هاللوحة

 
من الأحساء شكل ثاني إلي الدمام شكل ثاني خخخخخخ
بس إن شاء الله يخلونه عزاب ! .. ماعندنا مكان نروح له !
الله يخلي الراشد هو الوحيد ناصر الشباب في المنطقة
 
هو المكان الوحيد في المملكة إلي تشوفون فيه هاللوحة :

ولا نشوف حرمة توطوط هنا
.
.
.
 
المهم .. وصلت إلى باب وزارة الثقافة والإعلام في الدمام

 
 
دخلت وهناك السكرتي .. طلب البطاقة المدنية ودخلت ..
في شخص المفروض أروح له علشان أخلص أوراقي بسرعة
هالشخص دورت عليه دورت عليه بالموت لقيت مكتبه وفي النهاية طالع في إجازة !
 
 
دورت شخص ثاني مالقيته ! .. قلت إن رحت لمدير التحقيق على طول بيملكعوني !
والفسح مابيطلع إلا بعد أسبوع ! وعرضنا بعد 11 يوم ! .. المهم ماعندي خيار إلا
أني أروح لمدير التحقيق في المطبوعات والمنشورات علشان أطلع فسح للنصوص
رحت .. دقيت الباب سلمت عليه بإبتسامة .. عطيته الأوراق ودردشت معاه شوي ..
قال لي يمكن الموضوع يطول لأن مافي أحد الحين الأغلب في عطلة .. أنا هنا خفق قلبي
وقلت في نفسي "إييييه عزة الله الفسح ماطلع إلا بعد أسبوعين !! "
إبتسمت بوجهه وقلت: إن شاء الله بمعيتك تخلص بسرعة طال عمرك !
تبسم وقال : بحاول وبنشوف !
 
صليت على النبي وآله .. وإذا به ِ


طلع ورقتين من الدرج وقال لي : خذ خل كل مؤلف يعبي هالورقة وأرجع لي !
ناظرت الساعة (10:20ص) قلت: أقدر أروح الجامعة الحين أعبيهم وارجع ؟
قال: اسرع وتعال قبل الظهر ..
 
رجعت الجامعة طيرااااااااااااان .. رجت النادي أتصلت عالأول وجاء وعبى الورقة
والثاني أتصلت عليه .. مو في الجامعة يشتغل بره ولا يرجع إلا المغرب !! .. عبيت
بياناته من قاعدة بيانات النادي .. وبقينا بالتوقيع !..
شسوي ؟
أروح له العمل ؟!! لا صعبه
أأجل الشغل إلى السبت ؟ هم صعبة ! ويمكن ما أقدر أطلع الفسح بالوقت المناسب !

دقيت عليه وقلت له السالفة .. وباقي التوقيع .. قلت له وقع في ورقة وصور توقيعك ورسله لي وسائط !
وماصدق خبر هههههههه .. وقع وصور توقيعه ورسلاه لي .. وأنا نسخته عالورقة
وكذا خلصت امور الأوراق .. وطيراااااااااااااان للوزارة ههههههههههههههه
دخلت عليه 11:45 .. قال لي أوكي الأوراق كاملة .. روح وتعال لي بعد الظهر !
قلت له بعد كم تقريبا ًً ؟ .. قال لي تعال بعد نص ساعة
المهم .. وين أروح وين أروح ؟؟ مالي إلا بيت عمتي في الدمام
رحت بيت العمة .. صليت وأسترحت شوي .. وبعد نص ساعة رحت إلى الوزارة
خلصت الأوراق ولله الحمد .. ببركة الصلاة على محمد وآل محمد
أستلمت الأوراق وطيرااااااااااااان للجامعة << إلي يسمعك على هالطيران يقول عندك طيارة مو سيارة

رحت الجامعة ودخلت مكتب وكيل العميد .. حطيت الأوراق على مكتبه وبإبتسامة نصر قلت
" هذا التصريح وطلعناه "
تفاجئ ! .. وقال : شفت قلت لكم مشرفكم بيطلعه لكم بيوم واحد !
قلت له: مشرفنا مسافر وأنا إلي طلعت التصريح بدون واسطات !
( هه مايدري أن واسطتي هي الصلوات المحمدية ^_^ )
المهم .. وقع على الخطاب بقبول طبعة الإعلانات .. وطيرااااااااااااان لمطابع الجامعة قبل لا يسكرون
رحت وعطيتهم نسخ للإعلانات + الخطاب من العمادة .. قبلوا الخطاب .. وقالوا تعال لنا الأحد القادم !
( غريبة !!! .. عادة يحتاجون أسبوع لطباعة أي إعلان .. لكن هالمرة غير )
الحمد لله خلصت يومي بنجاح
الحين ساعة 3:30 .. جهزت أغراضي علشان أنزل الأحساء

:::::::::::::::::::::::::::::::::::::::::::::::::: :::::::
- ماذا نستفيد من هذا المشهد ؟ -
دائما نشوف سالفة التحدي وعدم الإستسلام في الأفلام ! والقصص
والأغلب يعرف أهميتهم و فائدتهم ، لكن انا شخصيا ً إذا في شيء يتعلق
بالزمن والإنجازات .. أخطط لهم من فترة .. والأشياء المفاجئة إلي تجي أوقف عندها !
في هالترجبة تعلمت أن أي حدث عرضي أو مفاجئ يحدث على عمل معين أو مشروع
لابد وأن نتحدى هذا العارض (أو المشكلة) ونحاول مانستسلم .. لأنه دائما هناك حل
:::::::::::::::::::::::::::::::::::::::::::::::::: :::::::

وصلت بالسلامة لأحسائي الحبيبة ، واليوم الجمعة توني أكتب لكم شصار معاي يوم الأربعاء
بكرة السبت برجع الظهران .. أراكم لاحقا ً ..
 
تحياتي 
علي البحراني