في 2 أغسطس 1990 غزت العراق الكويت ، و قد دام الاحتلال لمدة سبعة أشهر
.
.
.
السبت 16 رمضان 1430 هـ
5 سبـتـمبر 2009 م
اليوم بتكلم عن بلدي الآخر
عن وطني الذي ولدت ُ فيه
عن البلاد التي عاشرتها في الحرب والسلم
الكويــــت
دولة خليجيه صغيره نسبيا ً في المساحة و التكتل السكاني يكون على البحر
من الشمال للجنوب ، والعاصمة أسمها الكويت نظام الحكم أميري
ولدت ُ سنة 1986م في الكويت
في 2 أغسطس 1990 غزت العراق الكويت ، و قد دام الاحتلال لمدة سبعة أشهر
يعني عاشرت الحرب وعمري 4 سنوات
على رواية أهلي يقولون أن جلسنا في الكويت كم أسبوع وبعدين جينا السعودية
لأن ذيك الأيام السعودية والشرقية بالذات أستقبلت الاجئين وعطتهم سكن ..
وأذكر حتى فندق الهفوف في الحسا كان كله للكويتيين أيام أول
كنت طفلا ً ذو الأربع سنوات .
سبب ولادتي هناك و ترددي لها في كل عطلة هو لأن عندنا أقارب هناك
كل عطلة صيفية نمر عليهم وجلس عندهم كم يوم .. منصها صلة رحم ومنها سياحة
أحب في الكويتيين لهجتهم << من كثر ماكون وياهم أتكلم مثلهم ههههههه
حتى في الحسا من أول ابتدائي للحين في الجامعة أول من يكلمني ويسمع لهجتي
يقول لي أنت بحريني ؟ أو كويتي ؟
بس ما أتكلم مثلهم عاد بذيك اللهجة الكويتيه القديمة .. بس يعني في بعض الكلمات غير
وكنت وأنا صغير أواجه بعض السخرية من عيال عماتي و عمامي بسبب هاللهجة مثلا ً
على الكلمات إلي أقولها
في الحسا يقولون ملعقة أو قفشه .. أنا أقول خشوقه
هم يقولون جدار أو حيط .. انا أقول طوفه
هم يقولون كذا أو جذااه .. أنا أقول جذي
هم يقولون شدخل هالشيء ؟ أو شتبي أنت ؟ .. أنا اقول شكو؟ أو شكو أنت ؟
يقولون بقالة أنا أقول جمعية
يقولون أمزح أقول أتغشمر
طبعا مو دايما ً
.. يعني بعض الأحيان اقلب عالموجة الحساوية 
بس غالبا ً جذي هههههههههه
بس ماعليكم صرت أتكلم حساوي عدل في ثانوي
وصرت على حسب مزاجي أتكلم كويتي أو حساوي
.
.
في شغلة دايما ً أتسائل عنها
ألا وهي ليه السعوديين مايحبون الكويتيين ؟
كل ربعي و اصدقائي يعايبون عالكويتيين ولا يحبون فيهم شيء !
لا شكلهم ولا لبسهم ولا دولتهم ولا عملتهم ولاااااااااا شيء !!
ولمن أسأل ليه شالأسباب ؟
يقولون: متكبرين .. أغنياء وبطرانين عالنعمه .. فسوق .. غباء .. و و و
ولمن أسأله .. كم مرة رحت الكويت أو كلمت كويتي وعاشرته ؟
يقول لي: ولا مرة !
شلون تحكم على دولة وشعب كامل .. عن طريق التلفزيون وقنواته الفضائية فقط !
أو تحكم على شعب كامل بسبب غباء أفراء أو فسق أفراد !
ما أدافع عنهم بس كذا .. لكن هم مايصير نحكم عليهم بس كذا !
ودي اعرف ليه بعض السعوديين مايشتهون الكويتيين ؟
والقهر أقول للشباب .. تكرهون الكويتيين
وتتابعون مسلسلاتهم وتموتون عليهم
وفي الآونه الأخيره تفصلون ثياب طراز كويتي وتلبسون مثلهم
وبعض الناس يقلد لهجتهم !
وفي النهاية يقول: ما اشتهي الكويتيين
!.
.
المهم أقول لكم بنظل هنا القرقيعان والوفاه
وبنرجع آخر رمضانوالعيد أكيد حساوي هههههه .. شحلات العيد في الحسا
لي تدوينة عن السياحة في الكويت .. بس حبيت اسلم عليكم << مايقدر لازم يطل
.
.
.
الحين الكويت عندها أزمت نواب مجلس الأمه
وكل واحد لسانة شطوووله .. وكل ماصار شيء قالوا إستجواب
والحكومة مبتلشه مع هالنواب .. هذا كاريكاتير معبر عنهم ههههههههه
.
.
.
تحياتي
علي البحراني
ليست هناك تعليقات:
إرسال تعليق